Capitulum 3
De qualitate locorum quæ ab anachoretis expeti debent.
H INC ei qui sollicitudinem gerit pervigilem de interioris hominis puritate, quærenda sunt loca quæ nulla distractione sollicitent mentem ejus sua fecunditate ad quamcumque culturam, aut eum perturbent de suæ cellæ stabilitate fixaque mansione, sive procedere cogant ad opus aliquod subdivale; sicque cogitationibus ejus manifeste effusis per diversa, dispergat omnem mentis suæ directionem subtilissimumque ipsius intuitum. Quæ dispersio a nemine potest caveri neque videri, quamvis sollicitus sit et vigilans corde, nisi qui prius perseveranter recluserit corpus suum ac animum intra parietes claustri: ut ita tanquam piscator egregius providens sibi victum apostolica arte, intentus atque immobilis capiat agmina cogitationum natantia in tranquillissimo cordis sui profundo; et tanquam de prominente scopulo intuens curiose profunda, sagaci discretione dijudicet quos cogitatus debeat ad se trahere hamo salubri, et quos abjicere debeat tanquam malos ac noxios pisces.
Chapter 476 of 499