Capitulum 22

Interrogatio, qualiter intelligendum sit quod ait Salvator : Jugum meum suave est, etc.

GERMANUS : Quoniam contulisti nobis remedia contra nostras illusiones, et diabolicæ insidiæ quibus agitabamur, detectæ sunt (Deo præstante) per tuam doctrinam, precamur nobis exponi quod in Evangelio dicitur : Jugum meum suave est, et onus meum leve.¹ Quod videtur satis contrarium verbo illi Psalmistæ : Propter verba labiorum tuorum ego custodivi vias duras ;² quum et Apostolus dicat :³ Omnes qui pie volunt vivere in Christo, persecutionem patientur. Porro, quod durum est et persecutionibus plenum, non potest esse suave ac leve.