Capitulum 11

Quod occasione pecuniæ acquirendæ contubernia feminarum quærantur.

HINC jam quidam per vitiosum præcipitium lapsi, feruntur irrevocabili lapsu ad mortem. Non contenti soli possidere pecunias quas vel ante nunquam habuerant, vel initio malo servaverunt, inquirunt habitacula feminarum, quæ male collecta aut vitiose retenta custodiant; et tantis involvunt se occupationibus perniciosis ac noxiis, ut devoluti ad profundum inferni, dum acquiescere renuunt apostolicæ illi sententiæ, ut habentes victum et vestitum, contenti sint his quæ frugalitas monasterii exhibet, sed volentes divites fieri, incidant in tentationem laqueumque diaboli, atque in desideria multa inutilia et nociva, quæ mergunt hominem in interitum et perditionem.¹² Radix namque omnium malorum est cupiditas (id est philargyria): quam quidam appetentes, erraverunt a fide, et inseruerunt se doloribus multis.