Capitulum 1

DE SPIRITU PHILARGYRIÆ SIVE AVARITIÆ.

Quod alienum sit avaritiæ bellum; et quod avaritia non sit homini naturalis.

TERTIUM habemus conflictum contra avaritiam, quam appellare possumus amorem pecuniarum. Est iste conflictus, bellum alienum et extra naturam, nec aliunde in monacho sumens principium, nisi de ignavia corruptæ ac tepidæ mentis, et frequenter de principio abrenuntiationis male arrepto seu inchoato, ac tepido circa Deum amore fundato. Cetera namque vitiorum incitamenta, naturæ humanæ insita et quasi ingenita, videntur in nobis habere principium, et carni quodammodo inviscerata, et nativitati pene coæva, discretionem boni aut mali prævenientia. Et quamvis hominem prima impugnent, longo tamen labore vincuntur.