Capitulum 18

Quod non debeamus secundum proprias sententias vivere, si Apostolos cupimus imitari, sed debeamus sequi ipsorum vestigia.

QUAMOBREM si evangelico præcepto volumus obedire, et imitatores exsistere primitivæ Ecclesiæ illius, aut Patrum qui nostris temporibus successerunt virtutibus ac perfectioni illorum: non acquiescamus adinventionibus nostris, promittendo nobis evangelicam perfectionem de hoc tepido ac miserabili statu in quo proprium aliquid in claustro servatur; sed illorum sectantes vestigia, nequaquam studeamus decipere nosmetipsos: sicque pariter expetamus et amplectamur monasterii institutionem ac disciplinam, ut renuntiemus huic mundo in veritate; et nihil ex his quæ contempsimus reservantes trahente nos quadam infidelitate, acquiramus victum quotidianum proprio opere, non ex reposita seorsum pecunia.