VII. De Resurrectione Domini alia Prosa.

Ecce dies celebris:
Lux succedit tenebris
Morti resurrectio.

Laetis cedant tristia.
Cum sit major gloria,
Quam prima confusio.

Umbram fugat veritas:
Vetustatem novitas,
Luctum consolatio.

Pascha novum colite
Quod praeit in capite,
Membra sperent singula.

Pascha nostrum Christus est,
Qui pro nobis passus est
Agnus sine macula.

Hostis qui nos circuit:
Praedam Christus eruit.
Quod Samson praecinuit,
Dum leonem lacerat.

David fortis viribus:
A leonis unguibus
Et ab ursi faucibus
Gregem patris liberat.

Quod in morte plures stravit,
Samson Christum figuravit.
Cujus mors victoria.

Samson dictus sol eorum.
Christus lux est electorum,
Quos illustrat gratia.

Jam de crucis sacro vecte
Botrus fluit, in dilectae
Penetral Ecclesiae.

Jam calcato torculari,
Musto gaudent ebriari
Gentium primitiae.

Saccus scissus et pertusus:
In regales transit usus.
Saccus fit soccus gratiae,
Caro victrix miseriae.

Quia regem peremerunt,
Rei regnum perdiderunt,
Sed non delectur penitus
Cain, in signum positus.

Reprobatus et abjectus
Lapis iste nunc electus;
In trophaeum stat erectus
Et in caput anguli.

Culpam delens non naturam
Novam creat creaturam:
Tenens in se ligaturam
Utriusque populi.
Capiti sit gloria,
Membrisque concordia.
Amen.