XVI. De Sancta Agnete.

Animemur ad agonem:
Recolentes passionem
Gloriosae virginis.

Contrectantes sacrum florem
Respiremus ad odorem
Respersae dulcedinis.

Pulchra, prudens, et illustris,
Jam duobus Agnes lustris
Addebat triennium.

Proles amat hanc praefecti:
Sed ad ejus virgo flecti
Respuit arbitrium.

Mira vis fidei
Mira virginitas.
Mira virginei
Cordis integritas.

Sic Dei Filius
Nutu mirabili:
Se mirabilius
Prodit in fragili.

Languet amans, cubat lecto.
Languor notus fit praefecto:
Maturat remedia.

Offert multa, spondet plura;
Periturus peritura.
Sed vilescunt omnia.

Nudam prostituit
Praeses flagitiis,
Quam Christus induit
Comarum fimbriis,
Stolaque coelesti.

Coelestis nuntius
Assistit propius,
Cella libidinis
Fit locus luminis:
Turbantur incesti.

Caecus amans indignatur
Et irrumpens praefocatur
A maligno spiritu.

Luget pater, lugent cunct.,
Roma flevit pro defuncti
Juvenis interitu.

Suscitatur ab Agnete.
Turba fremit indiscrete:
Rogum parant virgini.

Rogus ardens reos urit.
In furentes flamma furit,
Dans honorem numini.

Grates agens Salvatori,
Guttur offert haec lictori
Nec ad horam timet mori,
Puritatis conscia.

Agnes, Agni salutaris
Stans ad dextram gloriaris,
Et parentes consolaris
Invitans ad gaudia.

Ne te flerent ut defunctam
Jam coelesti sponso junctam:
His sub agni forma suam
Revelavit atque tuam
Virginalem gloriam.

Nos ab Agno salutari
Non permitte separari.
Cui te totam consecrasti,
Cujus ope tu curasti
Nobilem Constantiam

Vas electum, vas honoris,
Incorrupti flos odoris,
Angelorum grata choris,
Honestatis et pudoris
Formam praebes saeculo.
Palma fruens triumphali,
Flore vernans virginali,
Nos indignos speciali,
Fac sanctorum generali
Vel suscribi titulo. Amen.