XXVI. De Sancto Bartholomaeo.

Haec prosa rhythmicae formae servat mensuram satis uniformem. Nam in omnibus suis versibus solas habet clausulas octo syllabarum, quarum penultima est brevis. In aliquibus quidem versibus, ut primis et postremis, duntaxat duas continet hujusmodi clausulas, ad invicem consonantes. In aliis vero, ut in meditullio fere constitutis, quatuor complectitur clausulas, interdum quidem quamlibet, ad proximam sibi consonantiae modulos servantem, ut prima scilicet secundae consonet, et tertia quartae. Interdum vero alternis locis responsum in finali desinentia habentes, ut prima ad tertiam referatur, et secunda ad quartam.

Laudemus omnes inclyta
Bartholomaei merita.
Cujus sacra solemnia,
Nobis inspirant gaudia.
Per diem centum vicibus
Flexis orabat genibus.
Nec minus noctis tempore,
Toto prostratus corpore.
In ipsius praesentia
Obmutescunt daemonia.
Christi sonante buccina,
Falsa terrentur numina.
Non Astaroth illudere
Genti permisit miserae;
Nec fallere, nec laedere,
Nec laesis potest parcere.
Gravi dignus supplicio,
Cruciatur incendio,
Quanta fit ejus tortio,
Berith patet indicio.
Per virtutes Apostoli
Patescit fraus diaboli.
Arte detecta subdoli,
Cultores cessant idoli,

Liber exsultat Pseustius,
Hostis repressa rabie.
Credit et rex Polymnius.
Propter salutem filiae.

Permissus ab apostolo
Daemon mugit ex idolo:
« A vobis ultra miseri
Sacra non posco fieri.

Me jam nil posse fateor,
Qui vix respirans torqueor
Ante diem judicii
Poenam ferens incendii. »

Sic effatus disparuit,
Et sigilla comminuit.
Sed nec praesentes terruit
Nam virtus crucis adfuit.

Christi signat charactere
Fanum manus angelica,
Laesos absolvit libere
Potestate mirifica.
Mox pellem mutat India,
Tincta baptismi gratia.
Ruga carens et macula,
Coelesti gaudet copula,
Currunt ergo pontifices
Ad Astiagen supplices,
Athletam jam emeritum
Poscentes ad interitum.
Sub Christi testimonio,
Caput objecit gladio.
Sic triumphavit hodie,
Doctor et victor Indiae.
Bartholomaee, postula
Pro servis prece sedula,
Ut post vitae curricula
Christum laudent in saecula. Amen.