IX. De Sancto Spiritu alia Prosa.

Simplex in essentia
Septiformis gratia
Nos reformet Spiritus.

Cordis lustret tenebras,
Et carnis illecebras
Lux emissa coelitus.

Lex praecessit in figura,
Lex poenalis, lex obscura
Lumen evangelicum.

Spiritalis intellectus
Litterali fronde tectus,
Prodeat in publicum

Lex de monte populo,
Paucis in coenaculo.
Nova datur gratia.

Situs docet nos locorum,
Praeceptorum, vel donorum,
Quae sit eminentia.

Ignis, clangor, buccinae:
Fragor cum caligine,
Lampadum discursio,

Terrorem incutiunt,
Nec amorem nutriunt,
Quem effudit unctio.
Sic in Sina lex divina,
Reis est imposita.
Lex timoris, non amoris,
Puniens illicita.

Ecce patres praeelecti,
Dii recentes sunt effecti,
Culpae solvunt vincula.

Pluunt verbo, tonant minis,
Novis linguis et doctrinis
Consonant miracula.

Exhibentes aegris curam,
Morbum damnant non naturam:
Persequentes scelera

Reos premunt et castigant;
Modo solvunt, modo ligant,
Potestate libera.

Typum gerit jubilaei
Dies iste, si diei
Requiris mysteria.

In quo tribus millibus
Ad fidem currentibus;
Pullulat Ecclesia.

Jubilaeus est vocatus:
Vel dimittens vel mutatus
Ad priores vocans status,
Res distractas libere.

Nos distractos sub peccatis,
Liberet lex charitatis.
Et perfectae libertatis
Dignos reddat munere. Amen.