Capitulum 16

Similitudo qua spiritus immundi cogitationes hominum scire docentur.

QUEMADMODUM enim quidam latrones et fures, in domibus quas furtim ingrediuntur, explorant divitias hominum quas non vident, spargentes manu minutas arenas in noctis caligine, ut opes in domo repositas tinnitu ad lapsum arenarum percipiant, sicque perveniunt ad certissimam notitiam rei aut cujuscumque metalli, productione soni eliciti; sic dæmones spargunt in cordibus nostris suggestiones iniquas, tanquam arenarum minutias, ut explorent cordis nostri thesaurum, quum juxta qualitatem suggestionum viderint exsurgere affectum corporeum, velut quodam tinnitu de intimis animæ conclavibus procedente, pensantes quid sit in interioribus mentis nostræ reconditum.