Capitulum 27

De tentatione abbatis Moysis.

SECUNDUS quoque, videlicet abbas Moyses, quum esset vir singularis et incomparabilis, tam duro confestim traditus est dæmoni propter unum increpatorium verbum quod paulo durius protulit disputans contra abbatem Macarium, quadam opinione præventus, ut humanas egestiones proprio ore ingereret. Porro quam pie Deus intulerit ei hoc purgationis flagellum, ne scilicet in tanto viro momentanea macula delicti maneret, monstravit velocitate curationis Moysis, et auctore remedii, puta Macario. Mox quippe ut Macarius oravit pro Moyse, spiritus nequam ab eo recessit citius verbo.