Caput VI. Quod secunda promotio virtutis sit in contemptu sui.

Redi ergo ad teipsum, et omni custodia custodi cor tuum. Sed vae tibi, si remanes ibi. Noli remanere, sed transi pergens, et pertransiens in locum tabernaculi admirabilis, usque ad domum Dei. Transi ergo et teipsum, perge in Deum tuum, quaere et apprehende summum bonum. Audi illam qui clamitat in plateis; ausculta vocem Sapientiae, ad hunc secundum nos transitum admonentis: Transite ad me, inquit, omnes qui concupiscitis me (Eccle. XXIV). Desere mundum, et factus est transitus Israel de Aegypto. Contemne teipsum, et factus est transitus Israel de deserto. Primum ergo transitum facit contemptus mundi, secundum transitum efficit contemptus sui. Ad primum transitum mare fugatur. Ad secundum transitum Jordanis convertitur. Fuga maris exterminatio amaritudinis. Conversio Jordanis reordinatio charitatis.