VII. Hoe men daghelics toenemt overmits die heilighe Sacramente

Noch es ene toecomst Christi ons brudegoms, die daghelies ghesciet in meerringhen der gracien en̄ in nuwer gaven. Dats alse de mensche enich Sacrament onfeet met oetmoe- digher herten, en̄ sonder contrarie dies Sacraments¹. Soe onfeet hi nuwe gaven en̄ mere gracien overmits sine oetmoedicheit, en̄ overmits Christus heymelic inwerken inden Sacramente. Contrarie der Sacramente, dat is ongheloeve inden doepsele, sonder rouwe inder biechten, en̄ met dootsonden ofte mit quaden wille ten Sacramente dies outaers gaen, en̄ alsoe vanden anderen Sacramenten. Dese en onfaen niet nuwe gracie; mer si sondighen noch meer.

Dits die andere toecomst Christi ons brudegoms, die ons nu daghelics yeghenwoirdich is. Dese selen wi merken, met begheerliker herten, opdat si in ons ghescie; want dies es noot, selen wi staende bliven en̄ voirtgaen in dat ewighe leven.