XVI. Van Saechtmoedicheiden

Ute deser verduldicheit comt saechtmoedicheit en̄ goedertierenheit, want nieman en mach saechtmoedich sijn in wederspoede, dan die verduldighe mensche.

Saechtmoedicheit maect inden mensche vrede en̄ pays van allen dinghen. Die saechtmoedighe mensche mach wel liden vreselike woerde en̄ vreselike maniere¹, ende vreselic ghelaet en̄ vreselike werke, en̄ alle ongherechticheit jeghen hem ofte jeghen sine vriende, en̄ alles² te vreden bliven, want saechtmoedicheit is doghen met vreden³.

Overmits saechtmoedicheit, blijft die toernighe cracht onberoert in ere stilheit⁴; die begheerlike cracht die wert in dogheden verhaven⁵: en̄ die redelike cracht die dit bekint, si wert verblijt; en̄ die consciencie die des ghesmaect, si blivet in vreden, want die andere dootsonde, toren, en̄ abolghe, en̄ gramscap es in hare verdreven, want die gheest Gods rast inden oetmoedighen saechtmoedighen mensche, en̄ Christus sprect: ‘Salich sijn die saechtmoedighe, want si selen die eerde besitten⁶,’ dat is hare eyghene nature en̄ ertsche dinghe in saechtmoedicheden⁷, en̄ hier na die cerde der levende in ewicheden.