VIII. Vander derder toecomsten Christi

Die derde toecomst, die noch toe te comene is, dat es ten ordele, ofte in die ure der doot. Die waeromme deser toecomst, dats bequamelicheit der tijt, behoirlicheit der saken¹, gherechticheit dies rechters.

Die bequamelike tijt deser toecomst, dats die ure der doot, en̄ ten lesten ordele alder menschen. Doe God die siele sciep van niete en̄ verenichde mit den lichame, doen sette hi hare enen ghesetten dach en̄ ene sekere ure, die hem allene cont is, dat si de tijt begheven moet en̄ openbaren sire yeghenwoirdicheit.

Behoirlicheit der saken; want die siele moet redene en̄ antwoerde gheven van woerde en̄ van al den werken die si ye ghedede, vore die ewighe waerheit. Gherechticheit des rechters, want Christo behoirt dat ordel en̄ dat vonnisse; want hi is des menschen sone en̄ die wijsheit des Vader, welker wijsheit alle ordel toebehoirt, want haer sijn claer en̄ openbaer alle herten inden hemel, en̄ inder erden, en̄ inder hellen. En̄ hier omme sijn dese ·iij· poente sake der ghemeenre toecomst inden jonxten daghe, en̄ oec der sonderlingher toecomst elkes menschen in die ure sijnre doot.