Capitulum 24 - Pauperes divites effecti persecuuntur Paupertatem.

¹ "Dolens dolebam ego de quibusdam magis, qui cum in seculo satis fuissent miseri et contemptibiles, postquam ad me venerunt, divites facti sunt (cfr. Apoc 18,19; 1Cor 1,5). ² Impinguati et incrassati fortius ceteris recalcitrant (cfr. Deut 32,15) deridentes me. ³ Ipsi certe vita ipsa putabantur indigni, egestate et fame steriles, qui mandebant herbas et arborum cortices, squalentes calamitate et miseria (cfr. Iob 30,2-4). ⁴ Nunc non sunt contenti communi vita, sed segregant semetipsos (Iudas 19), sine timore se ipsos pascentes (Iudas 12), quorum conversatio, superflua queritando, satis ceteris est molesta, affectantes honorem inter Christi discipulos, qui in seculo etiam inter notos valde contemptibiles erant. ⁵ Qui, cum hordeaceo pane et aqua sepe carerent et esse sub sentibus delicias computabant, filii stultorum et ignobilium, et in terra penitus non parentes (Iob 30,7-8), ad meas miserias devoluti sunt ((Iob 30,14), abominantur me et fuginnt longe a me, et faciem meam conspuere non verentur (Iob 30,10). ⁶ Contumelias et terrores passa sum ab eis, et qui erant pacifici mei et custodientes latus meum (Ier 20,10) insultabant mihi. ⁷ Verecundabantur de me et tanto magis abiciebant me quanto meo beneficio ditatos se fore sciebant, ita ut nomen meum dedignarentur audire".