Caput XIX. Solvitur argumentum septimum

Ad Septimum argumentum, ad primam rationem, quod imago non sit capax honoris, cum sit res inanima, et sensus, ac rationis expers. Respondeo, inde solum probari, imaginem non esse honoris capacem propter se, et ideo imagines non honorari absolute, sed relative ad prototypum.

Ad Secundam dico, imaginem esse sanctam propter duo. Primo, propter significationem, et repraesentationem rei sanctae: et hoc modo quaelibet imago Christi, vel Sanctorum etiam in officina existens, potest honorari.

Secundo, propter Ecclesiae institutionem. Nam quemadmodum calices, et vestes, et ipsi homines eo ipso fiunt sacri, quod dedicantur cultui divino, et separantur a profano usu; ita etiam imagines fiunt sacrae, cum ponuntur ab Ecclesia in templis, vel aliis, locis sacris, non ut pascant oculos curiosorum, sed ut excitent memoriam et amorem Sanctorum, et serviant cultui rerum sacrarum. In cujus rei signum solent aliquando imagines benedici, et precibus sacerdotalibus quodammodo sacrari, antequam in templis collocentur.

Ad Tertium dico. Primo, hojninem ut imdginem Dei esse dignum veneratione, ut supra ostendimus ex Cyrillo catechesi 12. et Augustino epist. 203. Dico Secundo cum Thoma Waldensi tom. III. de sacramcntalibus tit. 19. cap. 134. hominem non proponi ab Ecclesia colendum ut imaginem Dei, quia periculum 'esset, ne homo propter se coli putaretur; nam etiam propter se homo capax est honoris.