Capitulum 11

Quœstio, cur non jejunetur nec genua in oratione flectantur diebus Quinquagesimæ in Ægypto.

SED tempus jam est ut prosequamur ordinem collationis promissæ. Itaque quum abbas Theonas visitasset nos in cellula nostra in Quinquagesima, vespertinis orationibus persolutis, paululum considentes in terra, cœpimus diligenter inquirere cur Ægyptii monachi tam sollicite præcaverent, ne quis eorum curvaret genua in oratione per totum Quinquagesimæ tempus, aut jejunare præsumeret usque ad horam nonam; et eo diligentius interrogavimus istud, quo minus vidimus hoc servari tam caute in monasteriis Syriæ.