Skip to the text

Capitulum 29

De Fratre qui decem sportas publice sigillatimque vendidit.

NON tacebimus virtutes Fratris cogniti nobis, nobilissimi genere secundum sæculi dignitatem: nam comitis filius fuit, et liberalibus artibus non mediocriter eruditus. Qui dum relictis parentibus monasterium introisset, abbas ad probandum mentis suæ humilitatem fideique ardorem, confestim ei præcepit ut decem sportas quas publice vendi non erat necesse, propriis humeris circumferret per plateas, tali conditione vendendas, ut eas venderet sigillatim, quatenus diutius in hoc occuparetur officio. Quod ille tota devotione complevit, et omni verecundia Christi amore calcata, sportas humeris suis impositas statuto vendidit pretio, pecuniamque portavit ad claustrum; nequaquam perterritus novitate tam vilis et inconsueti officii, neque considerans indignitatem rei, aut nobilitatem parentum, seu venditionis contemptibilitatem, dum per obedientiæ meritum obtinere desiderat Christi humilitatem, quæ est vera nobilitas cordium.

Chapter 70 of 279