Capitulum 40

Quod monachus non debeat exempla perfectionis trahere a multis, sed ab uno vel paucis.

AD quod ut possis facilius pervenire, debes in congregatione habitans, exempla imitationis ac perfectionis expetere a paucis, imo ab uno aut duobus, non a pluribus. Nam præter id quod vita probata, perfecta et pura reperiatur in paucis, etiam ista utilitas inde causatur, quod homo diligentius instruitur ac formatur ad perfectionem cœnobialis seu monasticæ vitæ, exemplo unius, quam plurimorum.