CXLVI. Vander Arken lingden

Dese arke moet lanc sijn ·ij· cubitusse ende ·j· half, dat sijn ·ij· maten ende ene halve. De ierste mate, dat es een vrie toecomen Gods in ons¹; de andere mate dat es onse vrie toeganc in Gode². Dit sijn ·ij· maten, ochte ·ij· volcomene werke: dat ierste van Gode, dat ander van ons; ende dese werke werct God met ons ende wi met Gode. Maer noch heeft de arke ene halve mate meer, dat es dat dat werc der minnen altoes vernuwet, maer de eninghe blijft ghestade³. Ende daer omme es de mate half, want dat werc der minnen vernuwt altoes, ende nemmermeer en wert, God van ons gnoech ghemint, na dat hi werdich es, ende wijs begheeren; ende hier omme blijft die mate half ende onvolmaect; ende hier mede prueft men de edelheit ons Gods, ende onser minnen.

Ende dit es de lingde van onser arken.