CXLVIII. Vander breiden der Arken

De breide van onser arken dat es oec onderhalve mate. De gheheele mate leert ons dat wi ons selven ende alle menschen in minnen begripen, ende draghense in de breide der minnen Gods, die alle minnende in enicheit beveet. Ende hier na volcht de halve mate, die ons leert dat wi Gode nemmermeer gnoech gheminnen noch ghedanken en moghen van dien dat hi ons ghedaen heeft, van sinen ghichten¹ ende van sinen gaven die wi ontfaen hebben. Ende hier omme blijft dese mate altoes half ende onvolmaect; ende dat es hare meeste edelheit.