Psalmus CXXIX. Deprecatorius

PSALMUS CXXIX. DEPRECATORIUS.

Populus malis mersus peccata confitetur, ac Deum propitiatorem exorat.

VERSIO VULGATA.

1. Canticum graduum.

De profundis clamavi ad te, Domine : 2. Domine, exaudi vocem meam.

Fiant aures tuæ intendentes, in vocem deprecationis meæ.

3. Si iniquitates observaveris, Domine : Domine, quis sustinebit ?

4. Quia apud te propitiatio est, et propter legem tuam sustinui te, Domine.

Sustinuit anima mea in verbo ejus : 5. speravit anima mea in Domino.

6. A custodia matutina usque ad noctem : speret Israel in Domino.

7. Quia apud Dominum misericordia, et copiosa apud eum redemptio.

8. Et ipse redimet Israel, ex omnibus iniquitatibus ejus. VERSIO S, HIERONYMI.

Canticum graduum.

De profundis clamavi ad te, Domine. Domine, exaudi vocem meam :

Fiant aures tuæ intendentes ad vocem deprecationis meæ.

Si iniquitates observabis, Domine : Domine, quis sustinebit !

Quia tecum est propitiatio, cum terribilis sis. Sustinui Dominum.

Sustinuit anima mea, et verbum ejus expectavi : Anima mea ad Dominum.

A vigilia matutina usque ad vigiliam matutinam : Expectet israel Dominum :

Quia apud Dominum misericordia, et multa apud eum redemptio.

Et ipse redimet Israel, ex omnibus iniquitatibus ejus. 4. Quia apud te propitiatio est, et propter legem tuam : ita Symm. et Theodor. Hier. ad Sun. et Fret. At ibid. Hier. timorem in Hebræo reperiri notat ; et hic quoque sic vertit : Cum terribilis sis : præclaro sensu ; quasi diceret : Terribilis licet, tamen parcis. Hebr. vero : Propterea timeris, hoc est, eo quod sis clemens, verentur pii homines, ne tibi tam bono, tam benefico displiceant. Sustinui te : vide Hier.

6. A custodia matutina : a vigilia matutina, usque ad vigiliam matutinam ; Hier. ab uno mane in aliud. Præ excubitoribus matutinis, Hebr., quod bis repetitur, hoc est, semper et præ omnibus excubitoribus ad te vigilabo.