Psalmus CXXX. Moralis

PSALMUS CXXX. MORALIS.

David in sua majestate coram Deo se dejicit ; cujus exemplo populus liberatus, ejusque duces ac pontifices rebus prosperis non inflantur. Vide Psalmum C.

VERSIO VULGATA.

1. Canticum graduum David.

Domine, non est exaltatum cor meum : neque elati sunt oculi mei.

Neque ambulavi in magnis, neque in mirabilibus super me.

2. Si non humiliter sentiebam : sed exaltavi animam meam.

Sicut ablactatus est super matre sua, ita retributio in anima mea.

3. Speret Israel in Domino, ex hoc nunc et usque in sæculum. VERSIO S. HIERONYMI.

Canticum graduum David.

Domine, non est exaltatum cor meum, neque elati sunt oculi mei :

Et non ambulavi in magnis, et in mirabilibus super me.

Si non proposui, et silere feci animam meam ;

Sicut ablactatus ad (a) matrem suam, ita ablactata ad (b) me anima mea.

Expecta, Israel, Dominum : amodo et usque in æternum. 2. Si non humiliter : jurandi formula. Sed exaltavi animam meam : Hier. et non silere feci animam meam : si non eam compescui, ne vanis extolleretur cogitationibus. Sicut ablactatus : si non ita comparavi animam meam, ut similis esset puero ablactata, hoc est, tam humilis sum apud me et coram Deo, quam parvulus subditus matri. Sic David, II Reg., vi, 22 : Ante Dominum... vilior fiam plusquam factus sum, et ero humilis in oculis meis, etc.

(a) Var. : Super. — (b) Ablactetur super.