Capitulum 9

De quatuor speciebus orationis.

HIS itaque de orationum qualitate digestis, licet non quantum exposcit magnitudo materiæ, sed quantum admittit brevitas temporis, aut capere potest parvitas nostri ingenii cordisque hebetudo, difficultas major nunc imminet nobis, ut sigillatim exponamus species orationis, quas Apostolus insinuavit quatuor esse, dicendo : Deprecor primo omnium fieri obsecrationes, orationes, postulationes, gratiarum actiones.¹ Quæ non inaniter ab Apostolo taliter distinguuntur. Primo quoque quærendum est quid designetur per obsecrationem, quid per orationem, quid per postulationem, quid item per gratiarum actionem. Deinde quærendum utrum quatuor species istæ sint pariter assumendæ ab eo qui orat, ita ut omnes in unaquaque supplicatione simul jungantur; an potius offerendæ sint successive ac sigillatim, ita ut oporteat facere nunc obsecrationes, nunc postulationes; an certe alius debeat Deo offerre obsecrationes, alius postulationes, alius gratiarum actiones, secundum mensuram profectus quo unaquæque mens proficit juxta suæ intentionis industriam.