Capitulum 24

Quod non debeant alia postulari quam ista quæ in Oratione dominica continentur.

VIDETIS ergo qualis modus ac forma orationis sit nobis proposita a judice ipso qui per eam est exorandus : in qua nulla continetur mentio aut memoria divitiarum aut dignitatum, nulla petitio potestatis aut fortitudinis, nulla postulatio curationis corporeæ. Nam Conditor sempiternus non vult a se implorari aliquid temporale, caducum aut vile. Hinc injuriam maximam infert magnificentiæ et munificentiæ Dei, quicumque maluerit postulare transitoria et caduca, prætermissis bonis spiritualibus ac æternis; et talis vilitate suæ orationis incurrit offensam Judicis summi, magis quam propitiationem ipsius.