Capitulum 14

De gratiarum actione.

QUARTO loco gratiarum actiones ponuntur, quas mens per excessus ineffabiles reddit Deo, dum præterita ejus beneficia recordatur, aut præsentia contemplatur, aut intuetur quæ etiam et quanta præparaverit Deus in futuro his qui diligunt eum.¹² Ex qua consideratione fundi solent interdum preces uberiores, quando purissimis oculis speculamur præmia Sanctis in futuro reposita, atque ex hoc spiritus noster instigatur gratias Deo referre cum gaudio infinito.