Capitulum 11

Qualis cibus delicatissimus sit apud eos.

ILLAM quoque arduam et sublimem eorum abstinentiam prætermitto, in qua summæ deliciæ reputantur, si Fratribus ad refectionem apponatur herba sale condita et aquis lota, quam lapsanium vocant, alia quoque quamplura istis similia, quæ nec dispositio aeris, nec nostræ fragilitatis qualitas in hac regione admittit. Illa tantummodo prosequar, quæ nulla carnis infirmitas, nec situs loci poterit impedire, si fragilitas animæ teporque mentis non impedierit ea.