Capitulum 33

De absolutione quæstionis quam abbas Theodorus orando promeruit.

VIDIMUS quoque abbatem Theodorum summa sanctitate atque scientia decoratum, non solum in actuali vita, sed in Scripturarum notitia, quam ei contulerat sola puritas cordis, magis quam litteratura mundi aut studium lectionis : siquidem perpauca verba Græcæ linguæ potuit loqui, aut intelligere. Hic quum elucidationem cujusdam obscurissimæ quæstionis inquireret, septem diebus ac noctibus in oratione infatigabilis mansit, quousque ejus solutionem, Deo revelante, cognovit.