Capitulum 61

Qualiter superiores habere se debeant ad subditos, et econtra; et de quibusdam documentis ad prœlatos spectantibus; et qualiter diversos diversimode instruere debeant.

(a) ROGAMUS autem vos, fratres, ut noveritis eos qui laborant inter vos, et præsunt vobis in Domino, et monent vos:¹ ut habeatis illos abundantius in caritate, propter opus illorum.² Pacem habete cum eis.³ (b) Itaque qui hæc spernit, non hominem spernit, sed Deum. (c) Qui bene præsunt presbyteri, duplici honore digni habeantur, etc., ut supra.⁴ (d) Mementote præpositorum vestrorum, qui vobis locuti sunt verbum Dei: quorum intuentes exitum conversationis, imitamini fidem. Obedite præpositis vestris, et subjacete eis: ipsi enim pervigilant quasi rationem pro animabus vestris reddituri; ut cum gaudio hoc faciant, et non gementes: hoc enim expedit vobis.⁵ (e) Ejusmodi cum honore habetote, et cum omni gaudio excipite.

(f) Dum venio, attende lectioni, exhortationi, et doctrinæ.⁶ Noli negligere gratiam quæ in te est, quæ data est tibi per prophetiam cum impositione manuum presbyterii. Attende tibi, et doctrinæ. Insta in illis: hoc enim faciens, et te ipsum salvum facies, et eos qui te audiunt.⁷ (g) Manus cito nemini imposueris; neque communicaveris peccatis alienis. (h) Tu vero vigila, in omnibus labora, opus fac Evangelistæ, ministerium tuum imple.⁸ Sobrius esto. (i) Hæc commone testificans coram Domino.⁹ (j) Tu autem assecutus es meam doctrinam, institutionem, propositum, fidem, longanimitatem, dilectionem, patientiam, persecutiones, passiones:¹⁰ qualia mihi facta sunt Antiochiæ, Iconii, Lystris; quales persecutiones sustinui: et ex omnibus eripuit me Dominus. (k) Prædica verbum, insta opportune, importune;¹¹ argue, obsecra, increpa, etc., ut supra.

(l) Exemplum esto fidelium, in verbo, in conversatione, in caritate.¹² (m) Seniorem obsecra ut patrem;¹³ juvenes, ut fratres; anus, ut matres; juvenculas, ut sorores in omni castitate.¹⁴ (n) Tu autem loquere quæ decent sanam doctrinam: senes, ut sobrii sint, pudici, prudentes, sani in fide, in dilectione, in patientia; anus similiter in habitu sancto, non criminatrices, non multo vino servientes, bene docentes, ut prudentiam doceant; adolescentulas, ut viros suos ament, filios suos diligant, prudentes, castas, sobrias, domus curam habentes, benignas, subditas viris suis: ut non blasphemetur verbum Dei. Juvenes similiter hortare ut sobrii sint.¹⁵ (o) Hæc proponens fratribus, bonus eris minister Christi Jesu, enutritus verbis fidei et bonæ doctrinæ quam assecutus es.

Footnotes

1. (a) I Thess. v, 12; 13. ↩

2. (b) Ibid. IV, 8. ↩

3. (c) I Tim. v, 17. ↩

4. (d) Hebr. XIII, 7, 17. ↩

5. (e) Philipp. II, 29. ↩

6. (f) I Tim. IV, 13, 14, 16. ↩

7. (g) Ibid. v, 22. ↩

8. (h) II Tim. IV, 5. ↩

9. (i) Ibid. II, 14. ↩

10. (j) Ibid. III, 10, 11. ↩

11. (k) Ibid. IV, 2. ↩

12. (l) I Tim. IV, 12. ↩

13. (m) Ibid. v, 1, 2. ↩

14. (n) Tit. II, 1-6. ↩

15. (o) 1 Tim. IV, 6. ↩