IV. Van den Kerchove

Onse Here sprac tote Moysesse: ‘Ghi sult maken dat kerchof des tabernakels. Aen die suden side jheghen den middach soe saelt hebben ene cortine dobbel van byssen ·c· maten lanc (dese mate hetet cubitus, ende es die lingde van eens menschen hant metten arme toten elleboghe), ende ·xx· colummen met alsoe vele baesschen van ere¹ Hare capittele selen, sonder eer, ghebeelt, ute ghegraven, te male selveren sijn². In de noert side selen oec de cortinen ·c· maten lanc sijn, ende ·xx· colummen, ende alsoe vele baesschen van ere, ende die capittele selveren, ghelijc den iersten. In die breide dies kerchoves, te occidenten waert, soe selen sijn cortinen ·l· maten lanc, ende ·x· colummen, ende alsoe vele baesschen van eere. In die breide te orienten waert, ·l· maten. In die ene side selen die cortinen lanc sijn ·xv· maten, met drien colummen, met drien baesschen. In die andere side die cortinen ·xv· maten, met drien colummen, ende met alsoe vele baesschen. In den inganc des kerchoefs sal sijn ·j· cortine ·xx· maten lanc, ende die sal sijn van jacincte, ende van purpere, ende van dobbel roeder vaerwen, ende van bysse ghetwevoldecht³, ende al metter naelden ghenaeit ochte ghewracht. Ende si sal hebben ·iiij· colummen met ·iiij· baesschen. Alle de colummen des kerchoefs selen sijn bedect met selveren platen, ende die capittele al van selvere, ende die baesschen van mottale. Die lingde van den kerchove die sal sijn ·c· maten, ende alsoe lanc die cortinen in beiden siden. Die breide des kerchoves ·l· maten, ende alsoe lanc die cortinen in der breiden. Die hoghede van al den cortinen ·v· maten, ende si selen sijn dobbel byssinen. Ende al dit sal hebben baesschen van mottale. Alle de vate des tabernakels, die men orboren⁴ sal in der ghemeinre sacrificien, ende die stecken des tabernakels ende dies kerchoves⁵ die seldi maken van ere. Ghi selt ghebieden den kinderen van Israel datsi u bringhen die alre puerste olie van olive boemen, ende ontwe gestampet met enen stoetere⁶, alsoe dat die lucerne altoes berne in den tabernakel des ghetughes, buten den seile dat hanghet vore dat Orcunde⁷. Ende dese lucerne sal Aaron ordineren ende sine kindere, datsi lichten moghe tote der morghenstonden vore den Here. Dese oefeninghe sal ewech sijn van den kinderen van Israel overmids hare navolginghen⁸.’

Dit es dat utewendechste ende dat nederste deel der figuren die ic voreghenomen hebbe.

Nu willic ons leiden ende leren, metter waerheit die de figure bediedet, van buten inwert ende van den nedersten tote den hoechsten.

Soe wat minsche die ghehoersam wilt sijn Gode ende der heiligher Kercken met onghedeilder herten, hi wort ghevrijt ende ontladen van allen sunden, overmids dat bloet ons Heren. Ende hi Wert verbonden ende gheenecht met Gode, ende God met heme. Ende hi wert selve die arke ende dat tabernakel Goeds, daer God in woenen wilt, niet in der figuren maer in der waerheit; want die figure es leden⁹, ende de waerheit es oppenbare allen den ghenen die hen ter waerheit keren willen, ende scuwen ende vlien al dat hare contrarie es.

Footnotes

1. B. eere. Sur. bases aeneae. ↩

2. De tekst der Vulgaet heeft: Quae (columnae) capita cum caelaturis suis habebunt argentea. Het woord caelatura beteekent snywerk en dryfwerk. Hiervoor geeft onze schryver ghebeelt, dat is gebeeldhouwd, en ute ghegraven, dat is uitgesneden. Wt-graven vertaelt Kiliaen door exsculpere. ↩

3. bysso retorta. ↩

4. Gebruiken, benuttigen. Zie Kiliaen op oor-baren. ↩

5. tam paxillos ejus, quam atrii. ↩

6. piloque contusum. ↩

7. extra velum quod oppansum est testimonio. ↩

8. Perpetuus erit cultus per successiones eorum a filiis Israel. Cfr. Exod. 27, 9-21. ↩

9. Sur. figura namque praeteriit. ↩