XXVI. Vander gaven der Verstendecheit

Die edelste gave van desen ·vj· dat es die gave der Verstendecheit, omme datsi ons leert te anesiene ende te merkene Gode in sine menechfoldege rijcheit ende goetheit¹. Dese gave dat es ·j· overnaturlec licht, dat onse verstaen in sijnre hoecheit verclaren wilt, eest dat wi ons van binnen verheffen willen, ende desen lichte gehoersam sijn. Want dit licht eischt onsen inwindegen minsce ·j· overliden der sinne ende alre sinleker beelden², ende dat wi sterven der naturen ende leven in den geeste: ende alsoe wert gedeilt die inwindeghe minsce van den utewendegen. Want willen wi overliden sinleke beelde, ende sterven der naturen, soe vinden wi dit licht, ende soe ontfaen wi dese gave der claerheit in die hoecheit ons verstaens³. Want in den stervene, soe ontfaen wi die gave der verstendecheit, ende al ontfaende soe sterven wi der naturen; ende hier ute wast in ons ene sunderlinge doecht, die ute Gode ende ute ons geboren wert, dat es ene geesteleke opgaende gelost te Gode, die onsen inwindegen minsche altoes waken ende leven doet. Want dese levende gelost⁴ doet ons altoes Gode anesien ende merken met nuwen behagene in heme selven, ende in sine menechfoldege gaven⁵: ende in desen anesiene vernuut altoes dat sterven onser naturen; ende alsoe wast dat leven ons geestes in der genaden; ende hier mede bliven wi bi den lichte. Ende onse levende opgaende gelost, dat es die olie onser inwindeger vrouden, die wi altoes Gode offeren selen in die eersame lampte⁶ onser vrier willecheit. Ende hier ínne selen wi doen dat lenement rechter meiningen, dat es, dat ons boven alle dinc God behagen sal; ende alsoe sal onsteken die olie onser opgaender gelost, ende sal berren ende lichten metter gaven der verstendecheit: ende daer mede sal onse inwindege minsche leven ende gesien⁷ beide hier ende in der ewecheit. Want dese gave leert ons claerlec, ende sonder arbeit, die rijcheit Goods te anesiene, ende hoe God utevloeiende es met heme selven ende met allen sinen gaven; ende hoe wi heme van binnen antwerden selen met ons selven, ende met allen dien dogeden die wi geleisten mogen. Maer⁸ die gave der wijsheit verheft ons boven ons selven, ende doet ons eenvuldechlec in staren⁹, versmelten, ende vernieuten¹⁰, ende sterven ons selfs in minnen, ende in enecheiden met Gode. Ende aldus es groet ondersceet tusscen die ierste gave¹¹ die ons in leid ende verenecht, ende die naeste gave¹² die ons toe leidet, ende onsen toeganc van binnen verclaert.