VIII. Dat vierde principael Poent

Nu wille wi der figuren met claerren verstennesse ende gemerke noch meer inwert volgen, op dat wi geleert moghen werden, overmids kinnesse der waerheit ende godleke minne, hoe wi vercrigen mogen ende besitten enen volcomenen staet, dat es, een wel geordent redelec leven. Ende dit lere wi in den vierden poente der figuren dat ic voregenomen hebbe, ende daer ic nu af spreken wille.

Ghi sult weten dat onse Here sprac tote Moysesse aldus: Ghi sult maken ·x· cortinen van bysse getweerent, ende van jacincte, ende van purpere, ende van roeder varuwen tweewaerf geverwet, ende daer inne genaeit metter naelden ende gewracht¹ menegerande cierheit. Die lingde elker cortinen sal hebben ·xxviij· cubituse ende die breide ·iiij·. Eenre maten selen alle die cortinen sijn. Die ·v· cortinen selen hen underlinge werden te gadere gevoeget; ende die andre ·v· selen mede hangen² met geliken banden. Ende ghi sult maken strecke³ van jacincter varuwen in die siden, ende in die hogeden van den cortinen, alsoe dat si mogen werden te gadere ghevoeget. Die cortine sal hebben ·l· strecke in iegewelken deele, alsoe innegenaeit, dat iegewelc strec jegen den anderen come, ende die een strec den anderen moge werden toegevoeget. Ende ghi sult maken ·l· guldene ringe, daer men te gadere met sal voegen die seile⁴ van den cortinen, alsoe dat ·j· tabernakel werde. Ende ghi sult maken ellef harenc lakene⁵, mede te bedeckene dat dac des tabernakels. Die lingde iegewelker haren sal sijn ·xxx· cubituse ende die breide ·iiij·. Alle die harene lakene selen sijn gelijc van maten; van deser seldire ·v· voegen ten achtersten inde des tabernakels, ende die andere ·vj· daer jegen vergaderen, alsoe dat gi die seste hare in dat vorehode⁶ des tabernakels dobbel legget. Ende ghi sult maken ·l· stricke in den soem⁷ van der eenre haren, ende noch ·l· stricke in den soem van der andre, alsoe dat di ene moghe werden toegevoeget der andre; ende ·l· gespen van eere⁸, daer men die stricke inne vergaderen sal, alsoe dat van alle ·j· decsel werde. Die xjste hare⁹ die daer meer es, van dire eenre helecht die daer overblivet, daer mede seldi decken dat achterste des tabernabels, ende ·j· cubitus sal hangen van den enen dele, ende een ander van den anderen dele die meer es in de lingde der haren, iegewelke side des tabernakels bescermende. Ende ghi sult desen dake maken ·j· ander decsel van gheroedden weders vellen¹⁰, ende boven dat noch een ander decsel van vellen, ende die selen sijn van jacincter varuwen. Ende ghi sult maken, van houte van sethym, tafelen staende¹¹ des tabernakels, ende iegewelke sal hebben ·x· cubituse in die lingde, ende onderhalf in die breide; ende die siden van iegewelker tafelen selen sijn alsoe ingehouwen¹², dat die ene der andre moghe werden toegevoeget; ende in deser maniren selense alle bereet werden. Deser tafelen sal sijn ·xx· in die middach side, ten suden waert. Ende ghi sult hen ghieten ·xl· selvere baeschen, alsoe dat ·ij· baeschen iegewelker tafelen werden onder gedaen, in die ·ij· hoerneke. In die andere side des tabernakels, die noert- waert ghekeert es, ·xx· tafelen met ·xl· selveren baeschen. Twe baeschen selen iegewelker tafelen werden onderghedaen. In die west side des tabernakels, te occidenten waert, seldi maken ·vj· tafelen, ende noch twe andre di in die hoerneke selen werden opgerecht, achter den rugge des tabernakels; ende aldus selen si te gader gevoeghet sijn van boven tote beneden, ende ene toevoeginge sal alle die tafelen onthouden¹³. Dien tween tafelen, diemen in die hoerneke setten sal, dien sal men geven gelike toevoeginge den anderen: alsoe datter daer ·viij· si¹⁴ ende ·xvj· baeschen van selvere, onder elke tafle ·ij· Ende ghi sult maken ·v· grendele¹⁵ van houte van sethym, in die ene side des tabernakels die tafelen mede te onthoudene¹⁶; ende noch ·v· andere in die andre side, ende alsoe menegen in dat inde te occidenten waert. Dese grendele sal men doen vore die tafelen, van den oversten tote den nedersten¹⁷. Dese tafelen suldi vergulden, ende selter toe gieten guldene ringe, overmids welke ringe die grendele die tafelen moghen onthouden. Die grendele selen bedect sijn met guldenen platen. Ende ghi sult dat tabernakel oprechten na dat exempel dat u op den berch getoent es. Ende ghi sult maken ene cortine van jacincte ende van purpere, ende coccinen twewerf geverwet, ende van bysse getwerent, al metter naelden gewracht, ende met ingeweven menegerande cierheit. Dese cortine sal men hangen¹⁸ vore ·iiij· gulden colummen van houte van sethym, ende hare capittelen selen sijn te male gulden; maer die baschen beneden selen selveren sijn. Dit seil¹⁹ sal hangen met guldenen ringen vore die verguldenen colummen. Binnen desen seile suldi doen di arke²⁰ des getuuchs, met welken seile selen gedeilt werden²¹ die heilechdoeme ende dat heilege des heilechs. Ende boven die arke des getuuchs, in dat heilege der heileghen, seldi doen dat propiciatorium. Die tafele suldi doen²² buten den seile, in die noertside des tabernakels. Ende jegen die tafele²³ in die ander side, ten middage waert, den guldenen candelere²⁴. Ende ghi sult maken ene cortine, in den inganc des tabernakels, van jacincte ende van purpere, ende dobbel roet geverwet, ende van bysse getweerent, al metter naelden gewracht. Ende ·v· colummen van houte van cethym suldi vergulden, ende die capittelen al gulden, ende die baschen van mottale. Ende hier vore buten suldi die cortine hangen²⁵.