IX. Van der bediedenessen Moyses ende des tabernakels

Dit was dat tabernakel dat God Moysesse beval te makene na der figuren¹. Want Moyses was ·j· prince, ende ·j· voregangere der wet, ende ·j· sachtende middelere² tusschen Gode ende sijn volc. Ende hieromme fundeerde hi de wet van Goeds wegen, ende geboet desen tabernakel te makene, daer men Gode in dienen soude, ende daer God inne woenen woude, in midden sijn volc, tote dien tiden dat volbracht worden alle de figuren tote der waerheit, die si bedieden.

Met desen Moysesse versta wi Christum, alsoe als ic vore geseget hebbe, die onse prince ende onse voregangere es in der kerstenre wet, ende onse ghetrouwe middelere, die alle die figuren volbracht hevet tote in die eweghe waerheit. Ende hi hevet ons sachte ghemaect sinen Vader³ in alre noet daer wijs minleke met trouwen begeren. Ende overmids dat gebot ende den wille sijns Vader, hevet hi ghemaect een geestelec tabernakel, dat es de heilege Kerke, die eweleke bliven sal, na desen state der gracien, in state der glorien. Dese heilege Kerke, dat sijn alle goede minschen met Gode verenecht, ende te gadere geroepen iegewelc met al den anderen, overmids ene wet, ende een doepsel, ende een ghelove, ende haerre alre eendrachtege minne, met geliken werken, ende die ewege minne Goeds, daer hise alle in bevaen hevet: alsoe dat iegewelc es een wel verhouwen levendech steen van den tabernakel Goeds. Ende daerna⁴ dat ieghewelcs leven ende sine oefeninghe edel ende hoge es, daer na verciert hi meer ende meer den tabernakel Godes, dat es die heilege Kerke.