VI. Vander olien toter lampen

Hier na geboet Moyses van ons Heren wegen den kinderen van Israel, dat si olie van oliven souden bringen, al ontwe ghestampet¹, op dat die lucerne berren mochte vore den Here tote dier mergenstonden. Alsoe gelikerwijs hevet Christus, God ende minsche, ons allen geboden, die met sinen bloede verloest sijn, dat wi bringen selen pure gestampte olie, dat es compassie, underlinge minne, ende karitate, iegewelc tote den anderen in alre noet. Soe mach onse lucerne lichten ende berren; want die nacht der figuren es leden dat men olie van oliven soude berren, ende die mergenstonde is op gegaen, ende wi staen nu vore den Here. Eest dat wi ufenen werke der karitaten ende der ontfaermecheit, soe hebben wi die lucerne ende dat licht in ons, dat die figure bediedde. Want Christus met den sinen sal dit licht ordineren ende regeren tote in den dage des ordels. Ende dan sal hi gebenedien ende salech maken alle die gene, die nu lichten ende berren tote haren naesten met ontfaermecheiden. Ende hi sal vermaledien alle die gene die hen niet geoefent en hebben in sedeleken dogeden, ende in werken van karitaten, die hi selve vore gelevet hevet ende geleert, ende daer wi mede vonden moten werden, sele wi besitten dat ewege leven.

Dit es dat ander poent van dien ·vij· principalen, dat wi nemen ute dire figuren. Ende hier inne werden wi gheleert hoe wi ons ute geven selen tote onsen naesten in minlecker ufeningen, dats² alse wi vore, metten iersten poente overmids die doet ons Heren, gevrijt ende ontladen sijn van al onsen sunden.