XXXVI. Vander cledinghen der priesters

Met achte manieren van cledingen soe was geciert die overste priester in der joedscer wet, alse hi offerande soude doen in den tabernakel Goods. Alsoe gelikerwijs sal iegewelc bisscop ende prelaet der nuwer wet sunderlinge vore andere minschen gheciert sijn met achte principalen dogeden, daer die cledinghe der joedscher priesteren ene figure ave was.