XXXVII. Vanden viere clederen der ghemeine priesters

Dat ierste ornament des bisscops der Joden dat was een wit cleet van dobbelre byssen geweven, dat hem ginc van den lindenee tote den knien, datmen ane dede van beneden. Met desen dobbelen witten clede versteet men dobbele suverheit, dat es suverheit van lichamen, ende een starc wederstaen altoes iegewelcs opstaens in der veeleker gelost¹.

Dat ander cleet dat was oec dobbel byssinen, tote op die voete lanc, met ingen mouwen.². Dat es suverheit van herten, ende eersamheit in den seden ende in der wandelingen met den werken van buten, vore alle minschen. Dat derde ornament dat was een gurdel. Die werpte was al dubbel byssinen, ende daer in was geweven jacinct, ende purper, ende wormen, ende menegerande bloemen. Met der werpten versteet men ene pure consciencie met onnoeselheiden van levene. Dit es die werpte: hierinne salmen dragen jacinct, dat es hemelsche meininge; purper, dat es abstinencie alle der dinge die ongeorloeft sijn; woermen³, enen starken erenst Gode gnoech te sine ende allen minschen⁴; graciose bloemen, dat es andere minschen trecken ende leren met waerden ende met goeden werken. Dat vierde was een ornament des hoets⁵, dat was ene mitre van bysse⁶, met stertelen⁷ van jacincte op des priesters hoeft vaste gebonden, ende gehouden in alle der offeranden dien hi Gode soude doen. Hier mede versteetmen ene onbesorgede vriheit; want den vrien wille, dienmen den hoefde gelijct, dien behoert in iegewelken priestere onverbeeldet ende sonder sorge te sine, alsoe dat hi in allen sinen dienste onvermiddelt si, ende Gode werdege offerande doen moge: soe es sijn hoeft gheciert met der mitren der puerheit ende met dien sterken helme der bloetheit⁸, die nieman bestriden en mach alsoe huge als hi onghebeelt es⁹. Dese cierheit salmen vaste binden ende behouden met stertelen van jacincte, dat es met enen gehelen ave keere der werelt in inneghen ghebede, ende in hemelscer uefeningen. Dese viere ornamente waren gemeine alle den priesteren der Joeden die dienen souden in den tabernakel Goods, ende leven van dien offere dat Gode geoffert wart, in welker wise datment offerde¹⁰. Ende dese viere manieren van dogheden souden oec met rechte in allen priesteren sijn die van Christus goede¹¹ leven, ende heme geordent sijn te dienne ende sinen volke in der heileger Kerken. Ende in welken priestere dese dogede gebreken, hi es onwerdich te levene van dien goede, dot die Sone Goods verdient heeft met sire doet. Ende dat selve meine ic oec¹² van alle den ghenen die rinten heffen¹³, omme getiden ende omme ghebedt dat si doen souden in die ere Goods, ende vore die sunden der gherre diet Gode gheoffert hebben, daer si ave leven.

Noch was Aaron, die bisscop der Joden, ghecleedt ende gheciert met viere andre sunderlinghen ornamenten boven die ierste viere. Ende dese bedieden oec viere sunderlinghe doghede, die elken bisscop ende elken prelaet van rechte toe behoren.