L. Van den tiende artikele ons gheloefs

Die tiende steen hiet Crisolitus, ende hierinne stont Zabulon, die tiende sone her Jacobs. Met desen steene verstaen wi dat tiende artikel in onsen gheloeve, ende met dien name Zabulon sinte Symone, den apostel ons Heren. Want Zabulon ludet alsoe vele alse ·j· onderstant des habitakels¹, ochte hare habitakel², ochte ·j· habitakel der starcheit³ ende der scoenheit; ende hi bediet oec die vloede der nacht⁴ ende sijn ghesworen recht⁵. Ende dit leert ons al sinte Symon die apostel in den tienden lede ons gheloefs, daer hi sprect: ‘Ic gheloeve ghemeininghe der heileghen, verlatenisse der sonden.’ Dese ghemeininghe der heileghen, overmids sunderlinghe minne⁶, die es ·j· onderstant haers habitakels, ende haers te gadere blivens⁷; ende die selve ghemeininghe in godleker minnen es oec selve haer alder⁸ habitakel ende hare woninghe. Ende si es oec haerre alder starcheit ende hare scoenheit, want die ghemeine Christus⁹ met al sire verdienten es met minnen ghevloten in sine heileghen, ende si weder in heme. Ende hier inne besteet ·j· blide leven, dat ene sunderlinghe ghemeininghe es vloeiende in vrouden ende in salecheiden. Dese ghemeininghe der heileghen ende verlatenisse der sonden vercrighet men overmids die vloede der nacht, dat sijn twe sacramente der heilegher Kerken, doepsele ende penitencie. Dit sijn die vloede, die ave dwaen in den gheloeve die nacht der donkerheit, dat es die sonde: ende dit es Goeds ghesworen recht van Abrahams tide, dat hi ons hem selven gheven soude ghemeine¹⁰; ende overmids sine overvloedeghe ghemeine minne, woude hi ons wasschen in sinen bloede. Ende op dat wi sijnre eet sonder twivel gheloeven, die hi bi hem selven swoer, soe hevet hijt ons met sijns selfs doet beseghelt; ende die verdiente siere doet hevet hi ghemeine ghegheven der heilegher Kerken, in verlatenessen der sonden; ende hi heeftse ghemeine ghegheven den heileghen, in cierheit haerre glorien. Desen artikel ‘ghemeininghe der heileghen, verlatenisse der sonden’ bediet ons die preciose steen crisolitus, want hi ghelijct den wateren der zee, overmids sine doreschineghe claerheit ende groenheit, ende daermede es hi goutvaruwech¹¹. Alsoe ghelikerwijs sijn alle heileghen ende alle goede menschen dore scinech claer, overmids gracie ochte glorie; ende si sijn groene overmids hare heileghe leven; ende si sijn goutvaruwech overmids godleke minne, daer si alle mede doregaen sijn. Ende dese drie cierheiden sijn ghemeine allen heileghen ende allen goeden menschen; want het es die scat der heilegher Kerken, beide hier ende in den eweghen levene. Ende alle die verdreven hebben ute hen, overmids penitencie, die varuwe der roeder zee, dat es een sondech leven, die sijn den crisolituse ghelijc.

Ghi selt weten dat die zee roet es overmids dat lantscap ende den gront daer si op steet¹², dat es tusschen Jericho ende Zoara. Jericho ludet alse vele alse die mane, ende Zoara bediedet die beeste die redene verblint¹³. Tusschen die mane der onghestadecheit, ende jeghen redene te volghene der beestelecheit¹⁴, soe blijft¹⁵ altoes die roede zee, dat es ·j· verkeert leven. In die roede zee en mach geene creature levende bliven, ende al dat niet en leeft in hare, sinct te gronde: ende hier omme hetet si die doode zee¹⁶, omme dat ghene wandelinghe¹⁷ in hare en es. Ende si es ghelijc lime ochte tere¹⁸, want si veet¹⁹ ende doedet²⁰ al dat in hare comt. Ende aldus ghelijct si wel der sonden, die den mensche geesteleke veet²¹, ende doedet vore Gode²², ende selken versinct in den gront der hillen²³. Ende hier omme, wille wi verlatenisse hebben onsen sonden ende ghemeininge der heileghen, soe mote wi den crisolituse gheliken, ende soe mote wi Symonne volghen ons Heren apostel; want Symon dat es een hoerrere²⁴ der bedrueftheit sire herten²⁵, ende die ghehoersam es Gode ende der heilegher Kerken. Overmids ghewarege bedrueftheit van herten vercrighet men verlatenisse van sonden, ende overmids gherechte ghehoersamheit vercriget men ghemeininghe der heileghen.