Articulus 1
De intentione, processu ac titulo hujus opusculi.
QUI elucidant me, vitam œternam habebunt.1 Si Deum excelsum et gloriosum in Sanctis ejus laudare jubemur, juxta illud Psalmi, Laudate Dominum in Sanctis ejus :2 quanto magis in hac Sancta Sanctarum, omniumque Sanctorum sanctissima Domina ac Regina, Deum laudare debemus ? Et si accepta est Creatori piissimo ministrorum suorum laudatio qua laudantur a nobis in isto exsilio : quanto amplius complacet ei suæ præstantissimæ commendatio Genitricis a devotis exhibita famulis et ancillis ?3 Præterea, quum hortetur Scriptura et Sapiens dicat, Laudemus viros gloriosos et parentes nostros ; multo plus gloriosissimam istam, omnium nostrum benignissimam ac præcellentissimam spiritualemque Matrem, laudare et glorificare nos congruit. Certe non ignoramus quam libenter boni filii suos audiant collaudari parentes : quanto magis superbonus et optimus ille æterni Patris ac Virginis Matris unigenitus Filius, delectatur in suæ dilectissimæ Matris præconiis devote humiliterque exhibitis ?
Insuper, quo hæc incomparabilis ac inviolatissima Virgo in se ipsa melior, sanctior honorabiliorque consistit, eo justius atque decentius est ejus præconiis immorari. Præterea, quanto majora ac plura per eam et ab ea beneficia sumus sortiti, et adipisci confidimus atque optamus, eo frequentius et ardentius laudibus ejus intenti esse debemus. Rursus, quo amplius incessabilibus ac gratiosissimis ejus adjutoriis indigemus, eo affectuosius ejus commendationibus oportet nos inhærere, ipsamque invocare, venerari et exaltare. Item, quo fructuosius atque salubrius nobis est ipsam assidue cum omni reverentia collaudare, eo instantius ejus laudibus insistamus.
Hinc itaque ego, quantumlibet defectuosus, indignus et vilis, hanc amabilissimam Virginem, præclarissimam Dominam, Deiferam Matrem totis opto præcordiis collaudare, extollere, contemplari, totisque viribus venerari, alios quoque ad hæc eadem excitare. Hinc, de Dignitate et laudibus Virginis gloriosæ, opusculum istud reor intitulandum : quod ad superbeatissimæ Trinitatis gloriam et honorem in quatuor dividam partes. In quarum prima, tangentur præconia ad præclarissimæ Virginis corpus dignissimum specialiter suo modo spectantia; in secunda, de sapientia, scientia et prudentia sanctissimæ animæ ejus mentio fiet; in tertia, de virtutibus ejus; in quarta, de beatitudine ejus in anima et corpore erit tractatus.
Laudemus ergo hanc amantissimam Dei, quæ nobis totius nostræ genuit reparatorem et causam salutis, per quam a jugo peccati, a servitute diaboli, a damnatione perpetua sumus erepti. Glorificemus hanc beatissimam creaturam, in cujus manu est salus nostra, per quam ad æternæ beatitudinis reducimur fontem, atque ad lucem miserationum Dei deducimur : quæ nos dilectissimo ac unico Filio suo, vero Deo, Domino ac judici, salvatori creatorique nostro, potentissima est reconciliare, unire, ac semper tueri in ipso.
Footnotes
Chapter 3 of 118