Articulus 19
De veris, spiritualibus, copiosis ac indeficientibus gloriosæ Mariæ divitiis.
DEUS det vobis secundum divitias gloriæ suæ. Veræ divitiæ rationalis creaturæ sunt quæ ei invite auferri non queunt, ut sunt interna charismata Spiritus Sancti, gratia gratum faciens, virtutes et dona, beatitudines et fructus, virtuosique actus ac merita. His sacris divitiis, ut constat ex præinductis, adeo fuit repleta beatissima virgo Maria præ omnibus Sanctis, ut decuit electissimam Matrem Dei præ ministris ejus repleri, ditari, exuberare, ornari ab unigenito Filio suo, fonte munificentiæ infinitæ ac opulentiæ prorsus immensæ. Denique, quum ipsa constituta sit desuper mater gratiæ, mater misericordiæ, refugium pauperum, regina clementiæ, mater ac miseratrix cunctorum fidelium, decuit eam tanta spiritualium divitiarum plenitudine adimpleri, ut de plenitudine sua universis queat communicare, cunctisque miseris subvenire, totum mundum illuminare, ac omnium indigentias locupletare.
Hinc spiritualiter prorsus ditissima fuit, exuberantissima in omni sapientia, caritate, gratia, omnique abundantia deiformi. Quid namque Omnipotens suæ non daret electissimæ Genitrici? Nam et Deus dives perhibetur, non pecunia, sed omnipotentia.12 Unde, quemadmodum liberalissima fuit benedictissima virgo Maria ad dandum, ita et potentissima fuit ad prosequendum et succurrendum. Et sicut regnum misericordiæ ei commissum est, ita et divitiæ gratiarum ei redundantissime sunt collatæ ab eo qui dat omnibus affluenter.3
Præterea, adeo dives fuit, quod ipsum universarum divitiarum Fontem, causam, auctorem, infinitis in se ipso divitiis plenum, genuit, effudit, exhibuit nobis. Sicque fons processit de rivo, et Mater virginea facta est fons fluminis gloriosi, qui omnem terram, id est, totam irrigat ac perfundit Ecclesiam.4
O beatissima et præamabilissima virgo Maria, quam gloriosa dicuntur de te!5 Vere in plenitudine Sanctorum detentio tua, quæ universos Patriarchas fide vicisti, Prophetas lumine prophetiæque spiritu transcendisti, zelo quoque divini honoris ac fraternæ salutis superasti Apostolos, fortitudine martyres, devotione confessores, castimonia virgines, fecunditate conjugatos, puritate sanctitateque angelos.6 Nempe opulentissimum ac pretiosissimum illud balsamum Deitatis, exuberantissima unda gratiæ ac virtutis, fons bonitatis immensæ, tanta liberalitate ac plenitudine tibi influxit atque se ipsum infudit, ut copiosissime effluat circumquaque. Plane tu digne vocaris gratiis plena, quæ sola hanc gratiam quam nulla alia meruit, consecuta es, ut totius gratiæ replereris auctore.
Recte dixit de te devotissimus puer tuus Bernardus: O dives in omnes et super omnes Maria, cujus substantiæ modica pars assumpta, suffecit solvere totius mundi peccata, imo et gratiarum recuperare charismata, promererique nobis gaudia sempiterna! O tu fidelis Maria, quæ salutis antidotum viris ac mulieribus propinasti! De plenitudine tua accipimus universi. Et omne quod dat tibi Filius tuus, venit ad te;7 et eum qui venit ad te, non ejicis foras;8 nec ullum eorum permittis perire, quos dedit tibi Excelsus, quos per te speciali pietate ac munere decrevit salvare.
Footnotes
Chapter 88 of 118