Articulus 21

De multiplici acceptione intellectus.

COMPLETO sermone de dono sapientiæ pertractante, exigit ordo de dono intellectus tractari. Oportet autem in primis

De Cœlest. hier. c. I, II, vII, xxII; de Divin. nom. c. I; etc. cognoscere quoniam intellectus variis modis accipitur. Interdum enim pro substantia intellectuali suscipitur. Sic Dionysius frequenter angelos appellat intellectus cœlestes ac deiformes; sicque philosophi dicunt quod Deus est intellectus universaliter agens. Quandoque accipitur pro intellectiva potentia: ut quum dividitur in intellectum possibilem et agentem, qui sunt duæ potentiæ animæ rationalis. Vicissim quoque intellectus accipitur pro habitu per quem prima principia naturaliter innotescunt: et ita Philosophus inter quinque habitus intellectuales intellectum annumerat. Interdum autem accipitur pro actu intellectivæ potentiæ, seu pro veritatis notitia, ut ibi:¹ Servus tuus sum ego, da mihi intellectum; quamvis et ibi pro habitu accipi queat. Ubertim vero Augustinus hoc ultimo modo accipit intellectum, præsertim in libro de Trinitate.