Articulus 2

De triplici acceptione consilii.

CONSILIUM denique primo accipitur pro deliberatione ad finem intentum utili atque valenti : sicque consilium pertinet ad prudentiam. Secundo vocatur consilium ipsa persuasio consulentis de rebus excellentibus ad quas non obligamur : et ita dicitur Christus præceptis Decalogi addidisse consilia, quæ sunt de operibus perfectionis et supererogationis, ut illud :¹ Qui non renuntiaverit omnibus quæ possidet, non potest meus esse discipulus ; et, Si quis te percusserit in unam maxillam, præbe ei et alteram.² Tertio autem dicitur consilium providentia vehementer exercitativa, inter contemplativa atque activa dona exsistens media, et deliberativa de operibus arduis, sive sint determinata sive indeterminata : sicque consilium dicitur donum. Unde consilium versatur circa ardua, et per ipsum efficitur homo optime mobilis a Spiritu Sancto circa difficilia quæque seu ardua. Consilium igitur primo modo acceptum, est actus virtutis moralis ; sed tertio modo sumptum, est donum Spiritus Sancti, et habitus seu habitualis perfectio rationis.