Proœmium

DE DONIS CONSILII, FORTITUDINIS, SCIENTIÆ, PIETATIS ET TIMORIS.

EGO sapientia habito in consilio, et eruditis intersum cogitationibus. Prov. VIII, 12.

Postquam de præstantissimis duobus Spiritus Sancti donis, videlicet sapientia et intellectu, sermo expletus est, modo de tertio dono, puta consilio, per quod increata Sapientia se corda nostra inhabitare affirmat, tractare incumbit. Hoc quippe donum consilii in Scripturis nobis multipliciter commendatur, estque necessarium valde, præsertim in arduis rebus, et cavendis periculis in quorum medio positi sumus.