Articulus 26

Quomodo donum scientiæ acquiratur et perficiatur.

SAPIENTIA denique et intellectus, consilium atque scientia, quum sint supernaturalia dona Spiritus Sancti, humana industria nequeunt adipisci, nec virtute naturali acquiri vel perfici. Qui ergo dono scientiæ a Spiritu Sancto irradiari, ornari ac perfici cupit, totis conatibus vitiis reluctetur, pigritiam vehementer abhorreat, passiones exercitiis indesinenter expugnet, opusque Dei semper cum ampliori reverentia facere satagat, et de imperfectione sua fideliter doleat, atque injuriam Dei ulciscatur in se ; et quanto in istis amplius crescet, tanto in dono scientiæ clarius emicabit.