Articulus 46

De effectibus doni timoris.

HABET insuper timor hic multos præclaros effectus. Nam peccata expellit, juxta illud Ecclesiastici: Timor Domini¹ expellit peccatum. Negligentiam fugat, juxta illud : Qui timet Deum, nihil negligit. Ad sapientiam præparat, juxta illud : Initium sapientiæ timor Domini. Sapientiam parit, juxta illud : Radix sapientiæ timere Deum. Animum stabilit, et cordis salutem custodit, secundum illud Ecclesiastici : Nisi te in timore Domini instanter tenueris, cito subvertetur domus tua. Et breviter, timor iste omnium bonorum est fomes et custos ac munimentum. Quum enim nil nos a Deo dividat nisi peccatum, eo ipso quo timor iste peccatum expellit, ad omnem nos gratiam aptat ; estque omnium fundamentum donorum, reddens nos Deo præcipue subjectos, in divinis sollicitos, in omnibus timoratos ac agiles, omnemque superbiam totaliter exsecrantes.