Proœmium

DE EXEMPLIS

ET DOCUMENTIS AUTHENTICIS

DE EXEMPLIS ET DOCUMENTIS AUTHENTICIS

SAPIENTIAM Sanctorum narrant populi, et laudem eorum nuntiat Ecclesia.¹

Quemadmodum omnipotens sapientissimusque Creator in exordio mundi ornavit cœlum sideribus magnitudine, claritate, virtute, influentia differentibus; sic militantem decoravit Ecclesiam Sanctis gratiarum, virtutum, donorum multiplici varietate distinctis, luce sapientiæ, signorum efficacia diversimode expolitis. Inter quos beatissimi eremitæ et anachoretæ locum sortiuntur sublimem, qui angelicam vitam duxerunt in terris, et contemplatores fuerunt præcipui, caritatis ardore mirabiliter inflammati; qui mundum et carnem cum universis suis vanitatibus voluptatibusque excellenter vicerunt, atque arctissimam conversationem gesserunt in sæculo isto; qui veritati fidei christianæ verbis et factis, signis, prodigiis et miraculis testimonium præbuerunt certissimum. Eorum ergo « sapientiam » salutarem merito « narrant populi » christiani, « et laudem » ipsorum « Ecclesia » militans « nuntiat »: primo, ad Dei gloriam ac honorem, qui in suis Sanctis laudatur; secundo, quoniam ipsi suis virtutibus meruerunt ita laudari, et nostris præconiis dignissimi sunt effecti; tertio, ut ipsorum intercessione ac meritis mereamur juvari; quarto, ut ipsorum virtutes et signa narrantes aut audientes, ædificemur et provocemur sequi ipsorum vestigia; quinto, ut comparatione ipsorum humiliemus et despiciamus nos ipsos, imo, si boni quid agimus, si qua adversa æquanimiter patimur, respectu vitæ ac patientiæ illorum pro nihilo arbitremur, excepto quod fonti totius boni, Deo sublimi, pro donis suis humiliter regratiemur.

Denique, quia tam multipliciter fructuosum, dignum et utile est, Sanctorum vitam, virtutes, miracula recitare, promulgare, laudare; propono in isto opusculo notabilia quædam exempla religiosis præsertim salubria, ex libris Cassiani ac Climaci colligere ac referre de vita et gestis Patrum nostrorum eremicolarum, quæ in Vitaspatrum non continentur. Plerosque etenim exempla provocant magis quam verba aut documenta, et eos magis delectant. Propter quod asserit Leo Papa: Facilis ad exhortandum sit ratio, efficax ad persuadendum; validiora tamen sunt exempla quam verba, et majus est opere docere quam voce. Sanctus quoque Bernardus: Nullum, inquit, melius consilium arbitror, quam si exemplo tuo studeas fratrem tuum docere quæ oporteat et quæ non oporteat fieri, provocans eum ad meliora non verbo neque lingua, sed opere et veritate. Sed et beatus testatur Gregorius: Electorum mentes consideratis invicem alternis virtutibus inflammantur.

Præterea, collectio ista (ut reor) non erit superflua: quoniam libros Cassiani ac Climaci multi raro aut nunquam legunt, sive ex sua tarditate, sive ex sua simplicitate, quoniam libri illi sunt aliqualiter armati atque difficilis stili, et modus ipse loquendi frequenter obscurus est. Idcirco in isto opusculo uti intendo plano ac facillimo stilo.

DE EXEMPLIS

ET DOCUMENTIS AUTHENTICIS¹

Footnotes

1. Eccli. XLIV, 15. ↩