Articulus 9

De abstinentia senum quorumdam.

QUUM in monasterio quodam Ægypti abbas Cassianus comederet, hortatus est eum senior ut plus cibi acciperet. Qui respondit : Non possum. Dixitque senior : Ego hodie diversis advenientibus Fratribus sexies posui mensam et manducavi cum eis, et adhuc esurio; tu vero in prima hac comestione te tantum replesti, ut plus comedere nequeas.

Præterea, alius Pater in solitudine habitans, cibum solus accipere nunquam volebat : quod si per dies quinque aut plures nullus venisset ad eum, refectionem distulit, donec sabbato aut die dominica ad ecclesiam transiens, aliquem invenisset peregrinorum, quem secum adducens escam sumpsit cum illo, non tam suæ necessitatis causa, quam humanitatis gratia, et Fratris intuitu ac amore.