Articulus 7

De magna humilitate cujusdam nobilissimi Fratris.

ADOLESCENS quidam secundum carnis propaginem valde illustris, utpote filius comitis ditissimi, et liberalibus artibus præclare instructus, mundi pompis vanitatibusque renuntians, claustrum ingressus est. Cujus humilitatem et fervorem abbas experiri volens, præcepit ei ut decem sportas portaret de claustro ad civitatem, et eas in ea circumferret, quousque omnes publice vendidisset sigillatim, hoc est singulas seorsum ac diversis :¹² quod totum juvenis ille devote ac obedientissime adimplevit, omni humana verecundia supplantata. Hoc ergo exemplo discamus nos ipsos viriliter vincere, et omnem animositatem abjicere.