Laus superbenedictæ Trinitatis

TRINITAS supersancta, glorificanda, superfelix, perfecta, in te infinita dilectio, interminabilis sapientia, complacentiaque immensa.

Tu universæ in te beatitudinis plenitudinem possides; et quidquid vere desiderabile est, tu cum perfectione immensa superessentialiter contines.

In te plena communio, superjucunda diffusio, insegregabilis unio.

Trinitas superfelix, supergloriosa, et tibi soli plenarie nota, in te unaquæque persona vere et imperscrutabiliter, circumincessibiliter inconfusibiliterque consistit in alia.

Trinitas supervivens, cujus beatitudinis gloria est in se omniformiter infinita, tu tibi in te es vere supersufficientissima, omnium quoque intellectuum felicitas consummata.

Trinitas supersplendidissima, incircumscripta, et vere piissima, summa majestas, implens, conservans ac moderans omnia.

Tu ante omnia, non sola, post omnia, non præventa; in omnibus, non inclusa, extra omnia, non exclusa; supra omnia, non elata, infra omnia, non oppressa; manens æternaliter, in tua supersubstantiali simplicitate stans fixa.

Tu super omnia, præsidendo, infra omnia, sustinendo; intra omnia, adimplendo, extra omnia, complectendo; ante omnia, æternaliter subsistendo, post omnia, incommutabiliter permanendo.¹

Trinitas superbenedicta, essentialiter sancta et superpulcherrima, tu una essentia, una virtus, unus intellectus unaque vita.

Da nobis semper mentem in te absolutam et liberam, affectuosam, puram, in tua contemplatione tuoque amore quotidie perfectiorem.

Laus, honor, potestas, magnificentia, regnum et gloria tibi, Trinitas superexcelsa, Divinitas vera, Creator omnipotens, vivens et regnans per sæcula universa. Amen.

Footnotes

1. Ps. xlv, 5. ↩