Laus Dei ex evangelio, de futuro

judicio.

PRÆCEDENT adventum tuum terribilem signa in sole et luna ac stellis, et in terra pressura gentium præ confusione sonitus aquarum et maris.¹

Sol enim et luna, o Christe, obtenebrabuntur, et stellæ de cœlo cadere videbuntur.²

Tunc, o Judex horrende, arescent homines timore eorum quæ venient in eos;³ sed et cœlorum virtutes movendæ sunt motione reverentialis timoris.

Tunc apparebit, Salvator, signum crucis tuæ in cœlo;⁴ et videbit te venientem in nubibus cœli cum potestate magna et gloria omnis homo.

Tunc adducentur ante te homines universi, et judicabuntur a te secundum meritorum suorum exigentiam.⁵

Te jubente fiet repente generalis resurrectio mortuorum, colligentibus angelis sanctis cineres eorum, quos et ad tuum tribunal adducent, Rex universorum.⁶

Tunc facies ultionem electorum in reprobos, dando electis jucunditates æternas, reprobis vero cruciatus perpetuos.⁷

Da nobis nunc tuum judicium salubriter formidare, cui cum Patre et Spiritu Sancto est gaudium infinitum ac æternale. Amen.

Footnotes

1. Luc. xxi, 25. ↩

2. Luc. xxiv, 1. ↩

3. Luc. xxi, 26. ↩

4. Matth. xxiv, 30. ↩

5. Matth. xxv, 32 et seq. ↩

6. Matth. xxiv, 31. ↩

7. Matth. xxv, 46. ↩